Proqramımız başlanğıcını haradan götürmüşdür?

London şəhərində fəaliyyət göstərən, məhdud imkanlı və məhdud imkanlı olmayan rəqqaslardan təşkil olunan "Candoco" rəqs ansamblı bizim dəstəyimizlə 2013-cü ildə Azərbaycan Respublikasının paytaxtı Bakı şəhərinə səfər etmiş və "məhdud imkanlı insanlar" haqqında hər kəs tərəfindən qəbul edilmiş təsəvvürləri tamamilə alt-üst edən bir rəqs tamaşası ilə çıxış etmişdir.  

"British Council" incəsənət fəaliyyəti ilə məşğul olan məhdud imkanlı insanların məkanlara, prodüserlərə və qərar qəbul edən məmurlara çıxışının təmin edilməsi  və bu insanların inklüziv əsər yaratmaq və təqdim etmək bacarıqlarının inkişaf etdirilməsi yolu ilə onların dəstəklənməsi məqsədilə regional "Unlimited: Lazımi tədbirlərin görülməsi" proqramına qoşulmuşdur.  Biz hərtərəfli sosial modelin cəmiyyətin bütün təbəqələrinin rifahını təmin etməsində incəsənət və mədəniyyətin aparıcı rol oynamasını istəyirik. Məhdud imkanlı insanların sosial planlaşdırma və siyasətin işlənib hazırlanması prosesində iştirak edə bilməməsi üçün heç bir səbəb görmürük. Onlar auditoriyaları inteqrasiya olunmuş incəsənətlə tanış edərək sosial stereotiplərin qırılmasına və belə bir məntiqi nəticənin əldə olunmasına səbəb olur: onlar cəmiyyətimizin tərkib hissəsidir və onları diqqətdən kənarda saxlamamalıyıq.

Beləliklə, məhdud imkanlı insanları diqqət mərkəzində saxlayan "Shape Arts" incəsənət təşkilatının aparıcı təlimatçısı Barbara Lisiçki Azərbaycan Gənc Tamaşaçılar Teatrında və Rus Dram Teatrında məhdud imkanlı insanlar üçün müyəssərlik səviyyəsini yoxlamışdır. O, Azərbaycanın teatr mütəxəssislərinə teatrların müyəssərliyi mövzusunda seminar keçmişdir. Dekabr ayında forum-teatr üzrə ekspert Kerin Çepmen Sabah qrupu ilə əməkdaşlıq şəraitində Azərbaycan Dövlət Mədəniyyət və İncəsənət Universitetinin məhdud imkanı olan və olmayan tələbələri üçün interaktiv teatr metodları haqqında seminar keçirmişdir.