Azərbaycan Memarlıq və İnşaat Universitetinin prorektoru Ülkər Səttarova Birləşmiş Krallıq universitetləri ilə tərəfdaşlığın ali məktəb müəssisələrinin fakültə və məzunlarını necə dəstəkləyə biləcəyindən bəhs edən hekayəsini sizinlə paylaşır.
Beş-altı il öncə çalışdığım Azərbaycan Memarlıq və İnşaat Universitetinin nümayəndəsi və keyfiyyətli təhsil və təlim həvəskarı kimi "British Council"ın Bakıdakı nümayəndəliyi ilə əməkdaşlıq etməyə başladım.
Birləşmiş Krallıqdan ölkəmizə gətirilən fəaliyyətlərin rəngarəngliyi olduqca diqqətəlayiq idi: gənc müəlliflərin sərgiləri, əlilliyi olan insanların iştirakı ilə səhnələşdirilən tamaşalar, festivallar və universitetlər tərəfindən həyata keçirilən müxtəlif layihələr. Müşahidəçi kimi işə başladıqdan sonra əməkdaşlıq və tərəfdaşlığın insanlığı irəliyə aparan yol olduğunu və çalışdığım universitetdə gördüyümüz işlərə təkan verə biləcəyini anladım.
Birləşmiş Krallıqla tərəfdaşlıq və inkişaf
2016-cı ildə Lester Universitetinə tədqiqat turu həyata keçirəcək komandaya üzv seçildim. Birləşmiş Krallığa olan bu turda iştirak etdiyim üçün çox sevinirdim və universitetin ziyarət üçün mükəmməl seçim olduğu məlum oldu – Bakıya olduqca xoş təəssüratlarla qayıtdıq. Daha sonra Lester Universiteti ilə tərəfdaşlığımız əsasında iki universitetimiz üçün "Creative Spark" proqramının qrantını almaq məqsədilə müraciət etməyə və bu qrantı almağa müvəffəq olduq.
Mənim və gənc komandamın nə qədər sevindiyini təsəvvür edə bilməzsiniz! Bu addımımız olduqca böyük müvəffəqiyyətlə nəticələndi - tələbələrimiz üçün sahibkarlıq bacarıqları üzrə kompleks təlim paketləri gətirməyə, Azərbaycanda ilk "Creative Spark" ingilis dili qrupu vasitəsilə ingilis dilini öyrənmə proqramına start verməyə və bir çox başqa uğura nail olduq.
Yaradıcı cəhdlər
Hazırda iştirak etdiyimiz ilk böyük Birləşmiş Krallıq-Azərbaycan layihəsi "Creative Spark" proqramıdır. Bu proqram Azərbaycanın bütün ali təhsil sistemini əhatə edir və tələbələrimizin biznes və iş dünyasına hazır olmaları üçün tələb olunan bacarıqlar dəstini əldə etməklə sahibkarlıq bacarıq və biliklərini inkişaf etdirmələrini dəstəkləyir.
İkinci böyük layihə isə Məşğulluq üçün Ali Təhsil proqramıdır. Mənim üçün bu proqramın əsas nəticəsi Azərbaycanda mövcud olan ali təhsil mühitini dəstəkləyəcək və məzunlarımız üçün əlavə dəstək təmin edəcək siyasətin hazırlanmasına töhfə verməkdən ibarətdir.
British Council ailəsi ilə yerli və regional səviyyədə əməkdaşlıq edərkən fərqinə vardım ki, bu təşkilatdakı insanlar işlərini hədsiz dərəcədə sevir. Əslində, British Council ilə işləmək iş yox, ölkəmiz və cəmiyyətimiz - dəstək əldə etmək istəyən pedaqoqlar, tələbələr, əlilliyi olan insanlar və incəsənət sevərlər qarşısında yerinə yetirdiyimiz missiyadır.
