IELTS ötən il ərzində üç milyon yarım imtahanın təşkil edilməsi ilə dünyanın ən tanınmış, geniş istifadə olunan ingilis dili imtahanlarından biridir və 12 500-dən artıq universitet, məktəb, sahibkar və immiqrasiya orqanı tərəfindən tanınır.
Uzun illər ərzində British Council-ın Azərbaycandakı filialı IELTS vasitəsi ilə ölkədə tələbə və mütəxəssislər üçün imkanlar yaratmaq, onlara öz ambisiyalarını həyata keçirməyə kömək etmək işində ön sıralarda olmuşdur.
İmtahan verənlər və maraqlı tərəflərin təcrübəsinin yaxşılaşdırılması məqsədilə IELTS-i daima təkmilləşdiririk. Bu fəaliyyətin davamı olaraq, artıq Azərbaycanda imtahan verənlər 18 aprel 2019-cu il tarixindən başlayaraq IELTS imtahanlarını Bakıda yerləşən imtahan mərkəzimizdə təqdim olunacaq kompüter əsaslı imtahanın köməyilə verə biləcək.
Kompüter əsaslı IELTS kağız əsaslı IELTS-i əvəz etməyəcək, sadəcə imtahanın keçirilmə tərzi ilə əlaqədar daha çox seçim imkanı təklif edəcək. İmtahan verənlər artıq IELTS imtahanı verərkən özləri üçün ən münasib variant və vaxtı seçə biləcək. Onlar həmçinin nəticələri daha tez - adətən imtahanın tamamlanmasından sonrakı beş-yeddi təqvim günü ərzində əldə edə biləcək.
İmtahanın məzmunu və strukturu hər iki variantda eyni qalır və ən vacibi, danışıq imtahanı IELTS üzrə təsdiqlənmiş imtahan götürən şəxs ilə üzbəüz şəkildə aparılır. İmtahan verənlərin IELTS imtahanını kağız üzərində və ya kompüter vasitəsilə verməsindən asılı olmayaraq, onlar eyni etibarlı ingilis dili imtahanını verdiklərindən əmin ola bilərlər.
Kompüter əsaslı həll təhlükəsizdir və dünyanın aparıcı təhlükəsizlik, keyfiyyətin təmin olunması tədbirlərinin, eləcə də IELTS üçün xarakterik olan operativ üstünlüklərin təmin edilməsi imkanına malikdir.
British Council-ın Azərbaycandakı filialının ölkə üzrə direktoru Samr Şah bildirdi ki:
"30 il ərzində dünyanın ən tanınmış ingilis dili imtahanını müvəffəqiyyətlə təşkil etmişik. İndi isə böyük məmnuniyyətlə Azərbaycanda kompüter əsaslı IELTS imtahanlarının keçirilməsinə başlayırıq. Kompüter əsaslı həll minlərlə şəxsə daha çox seçim imkanı və daha yaxşı təcrübə təklif edərək, onlar üçün aparıcı akademik institutların qapılarını açacaq və karyera perspektivlərini inkişaf etdirəcək".
IELTS-in müvəffəqiyyəti dörd əsas dil bacarığını - dinləmə, danışıq, oxuma və yazma bacarıqlarını yoxlayan imtahanın yüksək keyfiyyətinə əsaslanır. O, Birləşmiş Krallıq və Avstraliyadakı xüsusi tədqiqat qrupları tərəfindən dəstəklənir və dünyanın 140-dan çox ölkəsində yerləşən mərkəzlər tərəfindən keçirilir.
Azərbaycanda kompüter əsaslı IELTS imtahanları Bakı şəhəri, Nizami küçəsi 90A ünvanında yerləşən Landmark Biznes Mərkəzində keçiriləcək.
Daha ətraflı məlumat üçün British Council-ın Azərbaycandakı filialının internet səhifəsinə nəzər salın.