British Council, Azərbaycan Respublikası Təhsil Nazirliyi yanında Peşə Təhsili üzrə Dövlət Agentliyi, turizm sənayesi müəssisələri və Birləşmiş Krallığın People1st təşkilatı ilə birgə əməkdaşlıq çərçivəsində keçirdiyi “Turizm-xidmət sahəsi üzrə kadrların təkmilləşdirilməsi və İş üzrə təcrübə proqramı”nı davam etdirir.

Proqramın əsas məqsədləri:

  • Peşə təhsili sektorunda təhsil alan gənclərin bilik və qabiliyyətlərini inkişaf etdirərək onların karyera imkanlarını artırmaq.
  • İşəgötürənləri iş üzrə təcrübə proqramı vasitəsilə təhsil proqramlarına cəlb etmək.
  • Peşə təhsilinin turizm sektorunun inkişafında rolunu artırmaq.

2016/2017-ci ildə keçirilən pilot proqramın nəticələri

Pilot Proqram çərçivəsində 2016 - 2017-ci akademik tədris ilində Turizm və Sosial Xidmətlər üzrə Peşə təhsili mərkəzində aşpaz, konsiyerj və mehmanxanada təsərrüfat işləri üzrə nəzarətçi ixtisasları üzrə bir illik proqramlar uğurla tədris edilmişdir.

Proqramın nəticəsi olaraq ixtisas üzrə nəzəri təlimlər və iş üzrə təcrübə proqramlarını uğurla bitirən şagirdlərin 50%-i təcrübə keçdikləri otellərdə işlə təmin olunmuşdur.

Layihənin partnyorları: 

Hilton Hotel, Fairmont Hotel, Absheron Hotel Group, JW Marriott Absheron Baku Hotel, Four Seasons Hotel, Intourist Hotel, Boulevard Hotel, Gilan Hospitality Group, Pullman Hotel, QafqaZ Baku City Hotel, Hyatt Regency Baku, Holiday Inn Baku Hotel.

2017 - 2018-ci akademik tədris ili

2017-2018-ci akademik tədris ilində Proqram hər üç ixtisas (aşpaz, oteldə konsiyerj və mehmanxanada təsərrüfat işləri üzrə nəzarətçi) üzrə genişləndirilərək Bakı və digər regionları (Qəbələ və Gəncə) da əhatə edəcəkdir.

Proqramı tədris edən müəllimlər 2017-ci ilin sentyabr ayında Birləşmiş Krallığın People1st təşkilatının mütəxəssisi tərəfindən keçirilən təlimlərdə iştirak edəcəklər. 

Proqram turizm sahəsi üzrə nəzəri və təcrübi biliklər əldə etmək istəyən şagirdlər üçün əla fürsətdir – belə ki, şagirdlər seçilən ixtisaslar üzrə zəngin nəzəri biliklər əldə etməklə yanaşı həm də partnyor otellərdə intensiv iş üzrə təcrübə qazanmaq imkanını da qazanacaqlar. 

Proqramlar ödənişlidir. Ödəniş haqqı barədə məlumatı Turizm və Sosial Xidmətlər üzrə Peşə Təhsili Mərkəzi, İctimai İaşə və Xidmət üzrə Bakı Dövlət Peşə Təhsil Mərkəzi, Gəncə Dövlət Peşə Təhsili Mərkəzi, Qəbələ Dövlət Peşə Təhsil Mərkəzindən əldə edə bilərsiniz.

Layihə barədə ətraflı məlumat üçün, Nigar Nəsrullayeva ilə əlaqə saxlamağınız xahiş olunur.