British Council və Ukraynanın Oleksandr Dovzhenko Milli Mərkəzi film bəstəkarları üçün Envision Sound maarifləndirici proqramın üçüncü hissəsində iştirak üçün ərizə qəbulunu elan edir. Yaradıcılıq laboratoriyası, mühazirələr, şəbəkələşmə, audiovizual sektorun mütəxəssisləri ilə fərdi məsləhətləşmələri, eləcə də canlı musiqinin müşayiəti ilə axşam saatlarında film nümayişlərini nəzərdə tutan bu proqram 20-24 yanvar tarixlərində Kiyev şəhərində keçiriləcək.

Envision Sound 2019-20 proqramı film musiqiləri bəstələmək bacarıqlarını artırmaq, peşəkar dünyagörüşlərini genişləndirmək və beynəlxalq audiovizual sənayeni daha yaxşı başa düşmək istəyən, Ukraynadan, Şərqi Avropa və Mərkəzi Asiyanın digər ölkələrindən gəlmiş bəstəkarlar üçün nəzərdə tutulmuşdur.

İştirakçılar mentorla filmlər üçün musiqi bəstələmək imkanlarını və bu sahədə mövcud olan çətinlikləri araşdırmaq və arxiv materialları və ya Ukrayna filmləri üçün öz saundtrekləri üzərində çalışacaq.

Britaniyanın tanınmış bəstəkarları Michael Price (BBC-nin Sherlock filminin musiqisinin həmmüəllifi və Emmy mükafatı laureatı), Nainita Desai (film və televiziya və BBC HBO, ITV kimi aparıcı yayım şirkətlərinin bəstəkarı, С4, Music+Sound və BAFTA Breakthrough Brits 2016-2017 mükafatının qalibi), Neil Brand (dünyanın ən yaxşı piano ifaçılarından biri), eləcə də Ukraynalı bəstəkar Alla Zahaykevych (Ukrayna Film Akademiyasının ən yaxşı bəstəkar üçün verilən Golden Dzyga mükafatının qalibi) proqramın mentorları qismində çıxış edəcək.

İlk dəfə olaraq Envision Sound 2019-2020 proqramının iştirakçıları yaradıcılıq laboratoriyasının tərkib hissəsi kimi Kiyev Fantastik Orkestri ilə öz musiqilərini yazmaq imkanı əldə edəcək. 2019-cu ilin fevral ayında Neil Brand-ın Alfred Hiçkokun Şantaj filminə bəstələdiyi musiqini ifa edən dirijor Natalia Stets-in rəhbərliyi altında orkestrin ifasının yer aldığı qısa video ilə tanış ola bilərsiniz. İştirakçılar həmçinin solo ifaçılarla da işləmək imkanı əldə edəcəklər.

Həmişə olduğu kimi, proqram başa çatdıqdan sonra British Council Oleksandr Dovzhenko Milli Mərkəzi ilə birlikdə yaradıcılıq laboratoriyası ərzində bəstəkarlar tərəfindən işlənib hazırlanan layihələrin bəzilərinin sonrakı inkişafını dəstəkləmək üçün əlavə qrantlar təqdim edəcək.

“Envision Sound 2019-2020” proqramı Alla Zahaykevych tərəfindən kurasiya ediləcək.

“Seminarda böyük film rejissoru ilə səmərəli bir əməkdaşlıq qurduq və hazırda onunla birlikdə möhtəşəm film üzərində çalışırıq. Film artıq imdb-də yer alıb. Həmçinin biz proqramın mentorlarından çox faydalı məsləhətlər aldıq”, - deyə Envision Sound 2018-2019 proqramının Gürcüstandan olan iştirakçıları Luka Lebanidze və Zviad Mgebrishvili bildirib.

İştirakçılar

Proqramda altısı Ukraynadan, altısı isə digər Şərqi Avropa və Mərkəzi Asiya ölkələrindən olan namizədlər üçün nəzərdə tutulmuş 12 yer ayrılmışdır.

İştirakçılara qoyulan tələblər

  • hər hansı bir filmdə və ya televiziya proqramı janrında ən az iki musiqi əsərinin müəllifi olan, karyerasının əvvəlində olan bəstəkar kimi fəaliyyət göstərmək;
  • ən azı B2 səviyyəsində ingilis dili biliklərinə sahib olmaq;
  • Ukraynanın və ya proqramda iştirak etmək hüququna malik olan aşağıdakı ölkələrdən birinin vətəndaşı olmaq: Albaniya, Azərbaycan, Bosniya və Herseqovina, Ermənistan, Gürcüstan, İsrail, Qazaxıstan, Kosovo, Makedoniya, Serbiya, Türkiyə, Özbəkistan və Monteneqro;
  • 2020-ci ilin 20-24 yanvar tarixlərində Kiyevdə keçiriləcək seminarlarda və digər proqramlarda iştirak etmək imkanına sahib olmaq.

Müraciət qaydası

Son iki və ya üç musiqi kompozisiyalarınıza keçid linklərinin də yer aldığı, ingilis dilində doldurulmuş ərizə formasını təqdim edin. Təqdim etdiyiniz əsərlərdən ən az biri kinematoqrafiya sahəsi ilə əlaqədar olmalıdır. Təqdim olunan hər bir musiqi əsərinin maksimal müddəti 15 dəqiqə olmalıdır. Ərizə forması ilə tanış olmaq üçün buraya tıklayın.

Xərclər

Envision Sound proqramında iştirak ödənişsizdir.

British Council digər ölkələrdən və Kiyevin hüdudları xaricindən gəlmiş iştirakçıların yol (təyyarə, qatar və ya avtobus) və mehmanxanada gecələmək xərclərini qarşılayacaq.

Əsas tarixlər

Müraciətin başlanma tarixi – 19 iyun 2019

Son müraciət tarixi – 4 avqust 2019

İştirakçıların elan olunması – 16 sentyabr 2019

Ev tapşırıqlarının verilməsi – 4-11 noyabr 2019

Kiyevdə Envision Sound proqramı – 20-24 yanvar 2020

Proqramın qrant alan finalçıları 2020-ci ilin fevral ayında elan olunacaq.

Proqramın işçi dili: ingilis dili, ukrayna dili / rus dili (ingilis dilinə sinxron tərcümə ilə).